Er mwyn lleihau eich risg o glefydau'r galon a chylchrediad y gwaed, mae angen i chi fod yn gorfforol weithgar bob dydd. Nid oes angen i chi wneud ymarferion penodol na chymryd rhan mewn chwaraeon, gallwch fynd am dro, torri'r lawnt, hwfro'r tŷ, neu ddawnsio i gerddoriaeth. Mae unrhyw weithgarwch yn well na dim, a dylech geisio torri cyfnodau hir o anweithgarwch, er enghraifft eistedd neu orwedd. Pan fyddwch yn gwylio'r teledu, codwch a cherdded o gwmpas yn ystod yr egwyliau hysbysebu. Anelwch at wneud o leiaf 150 munud o weithgarwch cymedrol yr wythnos. Mae hyn yn unrhyw beth sy'n codi cyfradd curiad eich calon, ac yn gwneud i chi anadlu'n gyflymach a theimlo'n gynhesach, er enghraifft cerdded yn gyflym neu feicio. Gallwch rannu'r 150 munud dros yr wythnos. Gallwch hyd yn oed wneud pyliau byr o weithgarwch – mae pob munud yn cyfrif. Dylech hefyd anelu at wneud gweithgareddau i gryfhau'r cyhyrau, megis defnyddio pwysau dwylo, dringo'r grisiau, garddio, er enghraifft palu, neu gario bagiau siopa trwm, a hynny o leiaf ddau ddiwrnod yr wythnos.